DAVAO CITY – Tulo ka mga gambalay ang naugdaw sa nahitabong sunog sa may C.M. Recto Avenue o kanhi nailang Claveria ning dakbayan, pasado alas-6:36 sa buntag, adlawng Biyernes, Mayo 31.
Nasayran nga nalakip sa sunog ang giabandonang New Davao Theatre ug ang kasikbit nga mga establisyemento nga Davao Hotel ug Davao Electronic Center.
Nagtinabangay ang mga kabumberohan sa Bureau of Fire Protection (BFP), Barangay Firefighter Volunteers, ug Central 911 sa pagpalong sa maong kalayo nga niabot pa sa second alarm.
Sumala sa post sa social media, natumpag ang firewall nga mupugong unta sa pagkuyanap sa halapad nga kalayo sa duha ka mga establisyemento.
Gideklarang fire-out ang tulo ka mga gambalay bandang alas-10 sa buntag.
Nasayran nga nahimong dagkong suruyanan niadtong dekada 70 ug 80 ang New Davao Theatre uban sa ubang mga sinehan nga naglaray sa maong dalan.
Padayon pang gisusi sa mga kabumberohan ang hinungdan sa insidente. Hinuon, walay gikataho nga naangol o naangol sa insidente.
Sa kasamtangan, wa pa matino sa mga imbestigador ang gibanabanang danyos sa maong sunog.
