PILIPINAS, NAKIG-KOORDINAR SA UBANG NASUD ALANG SA IGONG SUPLAY SA LANA

Nakig-koordinar ang Pilipinas sa ubang mga nasud aron masiguro nga igo ang suplay sa produktong petrolyo taliwala sa nagpadayong krisis sa lana.

Sumala ni Department of Energy o DOE Secretary Sharon Garin, lakip sa mga nasud nga nakigsabot sa Pilipinas ang Russia ug Australia.

Tumong niini nga mapun-an ang posibleng negatibong epekto sa krisis, ilabina kung magpadayon ang pagtaas sa presyo sa petrolyo.

Dugang pa ni Garin, mas gikabalak-an sa gobyerno ang posibilidad nga magkulang ang suplay sa lana kaysa sa pagtaas lamang sa presyo niini.

Nagpahayag usab siya og pagsalig nga motubag ang mga nasud nga ilang gikontak aron makatabang sa pagsiguro sa igo ug padayong suplay sa Pilipinas.