Gibarugan ni defense lawyer Michael Poa nga magpabilin sa 16 ka boto ang voting threshold alang sa conviction ni Vice President Sara Duterte sa impeachment trial karong Miyerkules, Setyembre 23, 2026.
Matud ni Poa, dili angay usbon ang threshold nga gigamit sa pagsugod sa paglitis tungod kay mahimong mausab ang gikinahanglang boto samtang nagpadayon ang proceedings.
Gipunto niya nga ang pag-usab sa threshold mahimong adunay epekto sa ubang probisyon sa 1987 Constitution nga nagkinahanglan usab og supermajority vote.
Lakip niini ang mga probisyon bahin sa martial law, pagpahawa sa miyembro sa Senado ug pag-amendar sa Saligang Batas.
Dugang pa ni Poa, kon mag-usab-usab ang boto depende sa sitwasyon, mahimong mawala ang kasiguroan sa gitakdang threshold.
Samtang, ginalantaw sa defense counsel ang posibilidad nga idangop sa Korte Suprema ang desisyon sa Senate Impeachment Court bahin sa voting threshold.
Lakip sa mga lakang ang pag-file og Temporary Restraining Order o TRO aron ipa-suspenso ang impeachment trial, sumala ni Poa.
Sa pagkakaron, makigpulong pa ang defense team kang Vice President Sara Duterte aron masabtan kon kanus-a nila sugdan ang lakang.
Nagpadayon ang diskusyon sa impeachment court bahin sa interpretasyon sa voting requirement. | VIA BOMBO EROS PAJOTA
