DAVAO CITY – Gibutyag sa opisyal sa PHIVOLCS-DAVAO nga si Eduardo Lauron nga mukabat na sa 3,039 ka aftershocks ang natala human nasinatian sa dakbayan ang 7.4 Magnitude nga linog nga mitay-og sa Hinatuan, Surigao del Sur.
Sa pakighinabi sa Bombo Radyo Davao ngadto kang Lauron, giklaro niini nga ang bagohay lang nga pagtay-og sa Hinatuan ang nagagikan sa Philippine trench diin miigo kini sa Davao Oriental ngadto sa CARAGA ug sa Surigao Area.
Dinhi sa Davao Region, ginatun-an pa gihapon ang kalihukan sa anaa sa 16 ka mga ginatawag nga inline faults lakip na ang Davao Fault System nga dunay lima ka segments lakip na ang Tamugan Fault nga dunay 25 kilometros ang gilay-on nga posibleng maigo gikan magnitude 6.4 hangtud 6.7 nga gikusgon.
Dugang pa sa opisyal, nagpahinabo gihapon ang aftershocks nga nanukad gikan sa Hinatuan apan nakabantay gihapon baynte kwatro oras ang mga opisyal sa PHIVOLCS Davao.
Sa pikas bahin, nakataas gihapon sa OCD Davao ang red alert gumikan sa nagpadayong aftershocks nga sumala pa sa PHIVOLCS, posibleng mulungtad hangtod katapusan ning tuiga.
Gipaklaro sab sa buhatan nga walay kamatuoran ang mga nanggula nga mga post sa social media mahitungod sa lima ka mga bulkan duol sa Hinatuan nga gikabalak-ang mubuto human sa linog.
Sumala pa sa buhatan, walay aktibong bulkan duol sa mga kadagatan sa Hinatuan ug ang nasinatiang mga pagtay-og ang resulta sa paglihok sa Philippine Fault.
Tambag sa buhatan nga dili dayon magpatuo sa mga sayop nga impormasyon nga nakahatag og hysteria sa publiko.
