Gibarugan ni Iranian President Masoud Pezeshkian nga dili moluhod ang Iran sa Estados Unidos aron lamang matapos ang hapit pito ka bulan nga gubat.
Bisan pa niini, gipahayag ni Pezeshkian nga andam ang Iran sa bisan unsang diplomatic solution aron masulbad ang panagbangi.
Sa iyang pakigpulong sa United Nations General Assembly sa New York, iyang giangkon nga nagdepensa lamang ang Iran batok sa mga pag-atake sa Estados Unidos ug Israel.
Gipakita usab ni Pezeshkian atubangan sa mga lider nga mitambong sa UN General Assembly ang mga litrato sa mga biktima sa pag-atake sa US ug Israel, samtang iyang gipasiugda nga dili mga terorista ang maong mga biktima.
Human niini, mipahawa usab ang Iranian president gikan sa opisina sa representante sa Estados Unidos.
Pasiugda usab niya nga ang bisan unsang kasabotan alang sa paghuman sa gubat kinahanglan maglakip sa paghunong sa Estados Unidos sa pagpugong sa mga barko sa Iran nga nagbiyahe sa mga importanteng ruta sa dagat.
Samtang, una nang mipadayag si US President Donald Trump nga nakigpulong na ang Estados Unidos sa mga representante sa Iran aron hisgutan ang posibleng pagtapos sa gubat.
