Giduso ni Senate Energy Committee Chairman Erwin Tulfo ang Senate Bill No. 2486 o Systems Loss Charge Removal Act nga nagtumong sa pagtangtang sa awtomatikong pagpabayad sa mga consumer sa gasto tungod sa system losses sa mga distribution utility ug electric cooperative.
Pagpaklaro ni Tulfo nga sa kasamtangan, dili lamang ang aktuwal nga konsumo sa kuryente ang gibayran sa mga consumer, kondili lakip na usab ang kuryenteng mawala sa dili pa kini makaabot sa ilang mga panimalay.
Lakip sa non-technical system losses ang power pilferage, illegal connections, depektibong metro, dili maayong maintenance, kakulangan sa billing ug dili episyenteng operasyon.
Ubos sa maong sugyot, ang Energy Regulatory Commission o ERC ang motino kung unsang mga gasto ang makatarunganon ug gikinahanglan, imbes nga awtomatikong ipasa sa consumers ang allowable system loss.
Tumong niini nga dasigon ang mga utility sa pagpugong sa pagkawat sa kuryente, pag-ayo sa mga metrohan, pag-ilis sa karaang kagamitan, ug pagpaayo sa serbisyo.
Adunay transition period nga hangtod tulo ka tuig alang sa ERC ug mga distribution utility sa pagpatuman sa mga kausaban.
Samtang, giila ni Tulfo ang bag-ong lakang sa Bureau of Internal Revenue nga nagtangtang sa VAT sa system loss charge.
Dugang pa niya, ang paningkamot sa pagpakunhod sa system losses kinahanglan magresulta sa mas maayong serbisyo ug pasilidad alang sa mga consumer.
