DAVAO CITY – Nanawagan si Dr. Ashley Lopez, Davao City COVID-19 focal person, sa mga nanimba sa St. Francis of Assisi sa Maa ning dakbayan nga mas maayong mopailalom sa swab test partikular na kadtong misimba sa milabay nga Disyembre 22 hangtud Enero 1 o ang panahon diin nakaserbisyo pa ang tulo ka pari ug usa ka seminarista nga susamang nadala karon sa ospital human natakdan sa COVID-19.
Sa kasamtangan, anaa na sab sa 18 ka mga indibidwal ang gipailalom na karon sa swab tests human nga nagbaton og closed contact sa mga pari ug padayon sab ang gipatuman nga lockdown sa simbahan.
Ning kasamtangan sab, nakapahigayon na matud pa og disinfection sa simbahan diin naga-misa ang mga pari ingon man gisubay na sab ang temporaryo nga gipuy-an sa mga nahisgutan.
Samtang nagpahigayon sab karon og pagpanubay ang DOH sa uban pang mga simbahan sa siyudad nga adunay mga misa sa milabay nga Disyembre kini aron masiguro nga paspas ang pagsuta kun ugaling adunay matala usab nga natakdan sa virus ilabi na nga ubay-ubay sab ang nanggawas kaniadtong holiday season aron nga motambong sa Misa de Gallo.
Via // Bombo Emman Dela Peña
