Mas gipahugtan sa Department of Social Welfare and Development ang mga lakang aron masiguro nga luwas ug maayong kalidad ang mga family food packs nga gitipigan sa ilang mga bodega sa tibuok nasud taliwala sa posibleng epekto sa El Niño.
Matud kang DSWD Spokesperson Assistant Secretary Irene Dumlao, adunay mga parameter nga gisunod ang ahensya aron malikayan ang pagkadaot o pagkapan-os sa mga relief goods tungod sa taas nga temperatura.
Lakip sa mga lakang ang regular nga pagmonitor sa temperatura sa mga warehouse ug pagsiguro nga hapsay ang kondisyon sa mga lugar nga gitipiganan sa food packs.
Nag-instalar usab ang DSWD og mga industrial ceiling fan aron makatabang sa pagkontrol ug pagpaubos sa temperatura sulod sa mga bodega.
Nakigtambayayong usab ang ahensya sa mga local government unit o LGU alang sa pag-andam og heat-insulated areas sa mga evacuation center aron maprotektahan ang mga internally displaced persons o IDPs batok sa grabeng kainit, ilabina kung adunay paghikling atol sa taas nga heat index.
Gipangandaman usab ang mga kabtangan alang sa luwas nga suplay sa tubig, lakip ang padayong pag-deploy sa water filtration trucks ug uban pang teknolohiya sa mga lugar nga posibleng maapektuhan sa El Niño.
Andam usab ang mga trained personnel ug augmentation support sa DSWD nga i-deploy depende sa panginahanglan sa mga apektadong lugar.
Sumala sa ahensya, kabahin kini sa mas lapad nga pagpangandam aron mapadayon ang kalidad sa relief supplies ug masiguro ang suporta sa mga komunidad sa dili pa mosamot ang epekto sa grabeng kainit ug uban pang kalamidad.
