Gipahunong sa makadiyot sa Senate Impeachment Court ang opisyal nga livestream sa impeachment trial ni Vice President Sara Duterte karong Biyernes, Oktubre 9, human nagpahayag og kabalaka ang testigo nga si Bureau of Internal Revenue o BIR Chief of Staff Atty. Anne Loraine Garcia-Marquez bahin sa pribadong impormasyon sa pipila ka opisyal sa ahensya.
Mitumaw ang maong kabalaka human gipakita sa mga monitor ug screen sulod sa korte ang sensitibong personal nga mga detalye sa mga revenue officer ug examiner sa BIR nga nagdumala sa mga dokumento alang sa pagsusi.
Tungod niini, gimandoan sa impeachment court ang temporaryong paghunong sa pagsibya aron masusi ug matabonan ang mga pribadong impormasyon sa wala pa ipadayon ang livestream.
Gitumong sa maong lakang nga masiguro ang pagpanalipod sa datos sa mga kawani sa gobyerno subay sa Data Privacy Act ug sa mga probisyon sa Tax Code nga naglatid sa pagkapribado sa mga rekord sa buhis.
Samtang, nagpadayon sa iyang testimonya si Garcia-Marquez sa ikaduhang adlaw sa iyang pag-atubang sa korte alang sa Article II sa impeachment complaint, nga naglangkob sa mga alegasyon sa unexplained wealth ug sa mga income tax return o ITR ni VP Sara ug sa iyang bana nga si Atty. Manases “Mans” Carpio.
Lakip sa gisusi sa maong pagdungog ang mga elektronikong dokumento nga gipresentar isip ebidensya, diin gikinahanglan ang tukmang pagdumala aron dili mabutyag ang mga pribadong impormasyon nga dili angay ipakita sa publiko.
Sa pagkakaron, nagpadayon ang impeachment proceedings samtang gisiguro sa korte nga ang mga dokumentong ipakita atol sa publikong pagdungog husto nga maproseso ug matabonan ang sensitibong datos, nga dili makalapas sa katungod sa pagkapribado sa mga kawani sa gobyerno.
