Gipangayo ni House impeachment adviser ug prosecution spokesperson Robert Ace Barbers ang mas lawom nga pagsusi sa mga impormasyong gipadayag ni kanhing senador Antonio “Sonny” Trillanes IV bahin sa giingong financial transactions sa pamilya Duterte.
Matud ni Barbers, dili lamang alegasyon ang mga gipresentar ni Trillanes tungod kay adunay mga bahin sa financial trail nga giingong nagtukma sa government records.
Lakip niini ang 19 ka random nga transaksyon nga gisusi, diin ang matag usa adunay tugbang nga entries sa Anti-Money Laundering Council records.
Pagpasabot ni Barbers nga maoy usa sa mga hinungdan nganong gilakip si Trillanes sa orihinal nga witness list sa prosecution alang sa Article II sa impeachment case.
Nalakip sa iyang mga gipadayag ang financial dealings sa pipila ka miyembro sa Duterte family ug businessman Samuel “Sammy” Uy, ingon man ang corporate records sa Gencorp Industries, Metro City Chow Foods ug Cale88 Foods Corporation nga giugnay kang Atty. Manases “Mans” Carpio.
Bisan wala na makatestigo si Trillanes, mipadayon ang prosecution sa paggamit sa mga documentary evidence nga may kalabotan sa iyang mga gipadayag.
Gipunting ni Barbers nga kinahanglan itandi ang maong impormasyon sa AMLC, bank, SEC ug SALN records aron matino kung unsa niini ang mapamatud-an pinaagi sa opisyal nga mga dokumento.
