Mitubag si Bicol Saro party-list Representative Terry Ridon sa kabalaka sa Palasyo bahin sa pagpa-tangtang sa bribery case batok kang Vice President Sara Duterte.
Sumala pa ni Ridon, girespeto niya ang pahayag ni Palace Press Officer Claire Castro, apan anaa na sa Senate Impeachment Court ang mga ebidensyang gipresentar sa prosecution batok sa Vice President.
Gipasabot niini nga ang mga impeachment article nga gipresentar sa prosecution anaa na sa korte, busa ang pagdesisyon sa kaso mag-agad sa mga ebidensya ug argumento nga anaa sa impeachment proceedings.
Kahinumdoman nga una nang nagkanayon si Castro nga mahimong mabati sa publiko nga gilimbongan sila kung tangtangon ang usa sa mga impeachment article human na mapresentar sa Senado ang mga ebidensya batok kang Duterte.
Una nang gipahibalo ni Manila Representative Joel Chua nga tangtangon sa House prosecution panel ang bribery case batok sa Vice President, aron mapadali ang paghusay sa impeachment case.
Sa pagkakaron, napresentar na sa prosecution ang mga ebidensya alang sa duha ka impeachment article, lakip ang alegasyon sa hulga batok kang Pangulong Ferdinand Marcos Jr., First Lady Liza Marcos ug kanhi Speaker Martin Romualdez, ingon man ang giingong sayop nga paggamit sa ₱612.5 milyon nga confidential funds.
Padayon nga anaa sa Senate Impeachment Court ang paghusay sa mga alegasyon batok sa Vice President, base sa mga ebidensyang napresentar ug sa mga depensang ipasaka sa duha ka kampo.
