Nanawagan si Philippine Red Cross Chairman Richard Gordon sa mga nasod nga miyembro sa Association of Southeast Asian Nations o ASEAN nga regular nga magpahigayon og hiniusang pagbansay sa pagtubag sa mga kalamidad aron mapaspas ang paghatod sa tabang sa mga apektadong lugar.
Sa iyang pakigpulong atol sa ASEAN High-Level Meeting on the ASPECT Framework sa Manila karong Huwebes, gibutyag ni Gordon nga ang pagpangandam kinahanglan sugdan sa wala pa moabot ang krisis, ilabina sa mga kalamidad nga nagkinahanglan og tabang gikan sa nagkadaiyang nasod.
Sumala pa kaniya, pinaagi sa regular nga joint disaster-response exercises ug pagplano sa posibleng mga senaryo, masulayan ang ka-andam sa mga nasod ug matino ang mga lakang nga angay ipatuman panahon sa emerhensiya.
Gipunting usab ni Gordon ang panginahanglan nga adunay klaro nang mga kasabutan bahin sa customs ug sa paspas nga pagsulod sa mga humanitarian worker, tambal, relief goods ug mga kabtangan pinaagi sa mga utlanan sa matag nasod. Matud pa niya, makatabang kini aron malikayan ang mga babag ug kalangay sa paghatod sa hinabang sa mga komunidad nga nanginahanglan.
Dugang pa, gisugyot sa pangulo sa Philippine Red Cross ang regular nga panaghisgot ug simulation exercises tali sa mga ASEAN Red Cross ug Red Crescent Societies aron masuta ang ilang kapasidad sa pagdawat ug pagpadala og tabang sa panahon sa kalamidad.
Gipunting ni Gordon nga ang hiniusang pagtubag sa mga kalamidad dili angay kutob lamang sa mga kasabutan nga anaa sa papel, kondili kinahanglan mapamatud-an pinaagi sa aktuwal nga pagbansay, koordinasyon ug pagpatuman.
Sa pagkakaron, gipunting sa panawagan ang pagpalig-on sa kooperasyon sa mga nasod sa ASEAN aron masiguro ang mas paspas, hapsay ug hiniusang paghatag og tabang sa panahon sa kalamidad.
