Miatubang si Vice President Sara Duterte sa Quezon City Regional Trial Court Branch 98 pasado alas-8:00 karong buntaga, Oktubre 9, 2026 alang sa iyang arraignment sa tulo ka ihap sa kasong grave threats.
Atol sa arraignment, pormal nga basahon sa korte ang mga kaso batok sa Bise Presidente ug pangayoon ang iyang guilty or not guilty plea.
Nag-ugat ang mga kaso sa mga pahayag ni Duterte atol sa usa ka online press conference kaniadtong Nobyembre 2024 kabahin sa giingong pagkuha og hitman aron patyon sila ni Pangulong Ferdinand Marcos Jr., First Lady Liza Araneta-Marcos ug kanhi House Speaker Martin Romualdez kon adunay mahitabo kaniya. Apan, gilimod ni Duterte ang maong mga alegasyon.
Kahinumdoman nga una nang gi-postpone ang arraignment kaniadtong Septiyembre 11, 2026. Gipagawas una sa korte ang arrest warrant, ug nag bayad og piyansa si Duterte nga mokabat sa ₱120,000 sa matag ihap sa kaso kaniadtong Septiyembre 5, 2026.
Lakip usab ang mga alegasyon sa hulga ug pagpanghadlok sa mga isyu nga gihisgutan sa impeachment trial batok sa Bise Presidente sa Senado.
