Naghi-usa pag-usab ang pipila ka mga supporters ni Vice President Sara Duterte sa Quezon City Regional Trial Court niining Biyernes sa buntag aron ipakita ang ilang suporta sa bise presidente taliwala sa iyang giatubang nga kasong grave threats.
Bitbit sa pipila sa mga mitambong ang mga litrato ni VP Sara isip pagpahayag sa ilang pagsupporta sa adlaw nga gitakda unta ang arraignment o pormal nga pagbasa sa mga sumbong batok kaniya.
Samtang, mokabat sa 100 ka mga pulis ang gipakatap sa palibot sa korte aron pagsiguro sa seguridad ug pagmintinar sa kahapsay sa lugar atol sa gitakdang pag-atubang sa bise presidente.
Dili sama kadaghan sa miaging pag-atubang ni VP Sara niadtong Septiyembre 11 ang mga tigsupporta nga mitambong karong adlawa, diin mas daghan ang nagtigom sa maong higayon aron ipakita ang ilang suporta kaniya.
Apan, wala na usab madayon ang arraignment sa bise presidente ug gipahibalo nga ipahigayon kini sa laing petsa.
Sa pagkakaron, wala pa magpagawas og tino nga petsa kung kanus-a ipadayon ang arraignment, sumala sa impormasyong gipaambit sa abogado ni VP Sara.
