DAVAO CITY – Human nga nakadawat og positibo nga feedback sa pag-host sa Ironman 70.3 sulod sa duruha ka tuig, nakadawat ang dakbayan sa Davao ug pasidungog gumikan sa nahisgutan nga international sports event.
Gitunol sumala pa sa siyudad ang pasidungog nga “Best Destination Marketing” alang sa Ironman 2018 atol sa Philippine Sports Tourism Awards nga gipahigayon sa Resorts World sa kaulohan.
Gidawat ang maong pasidungog ni City Administrator Zuleika Lopez, City Tourism Operations Office (CTOO) head Generose Tecson, ug Human Resource Management Office (HRMO) head Lemuel Ortonio.
Sumala pa kang Tecson nga gihatag ang maong award sa dakbayan tungod sa nahimong kalampusan niini sa pag-host sa Ironman 2018, luyo sa gipatuman nga Martial law sa Mindanao.
Nasayran sa nahisgutan nga atol sumala pa sa registration sa Ironman 2018 nga gipahigayon kaniadtong Oktubre 2017, na-ilog sa dakbayan ang record sa Ironman Philippine nga adunay kinatibuk-ang 1,800 race participants ug napildi niini ang Cebu City.
Gitataw sab sa tourism officer nga ang siyudad sa Davao ang nakaangkon sab og “Best Ironman In Overall Preparation,” ug “Best Post Race Celebration” atol sa post evaluation survey sa March 2018.
Gikanayong ang Ironman sa mosunod nga tuig ang gikatakda sa Marso 22, 2020.
