Mikabat na sa kapin 500 sa 3,700 ka high schools sa France ang naapektuhan sa nagpadayon nga protesta sa mga kabatan-onan tungod sa ilang pagkadismaya sa kahimtang sa sektor sa edukasyon.
Sumala sa mga taho, nakig-atubang na sa riot police ang liboan ka mga demonstrador, samtang adunay mga dalan nga gisunog tungod sa nag-init nga protesta.
Usa ka 17-anyos ang gikatahong gidakop kaniadtong Biyernes, Oktubre 2, 2026 tungod sa giingong attempted homicide batok sa usa ka police officer.
Samtang, mokabat sa 170 ka estudyante ug kapin 65 ka staff member ang gikatahong nasamdan, diin 40 niini mga high school principal. Mokabat usab sa 100 ka eskwelahan ang nagtala og dakong kadaot tungod sa bayolenteng mga protesta.
Kahinumdoman nga nagsugod ang mga protesta sa Paris ug mikaylap ngadto sa ubang dagkong siyudad sama sa Montpellier, Nantes ug Marseille.
Gipahinabo sa mga estudyante ang protesta tungod sa ilang reklamo nga kulang ang mga magtutudlo ug pasilidad sa mga eskwelahan, nga ilang giingong nakaapekto sa kahimtang sa edukasyon sa nasud.
