Nagpahimangno ang Malacañang sa publiko batok sa pag-hoard o sobra nga pagtipig og bottled water isip pagpangandam sa posibleng pag-igo sa Super El Niño.
Gipasiugda ni Presidential Communications Office o Palace Press Officer Undersecretary Claire Castro nga angay mag-andam ang publiko, apan dili kinahanglan nga mag-panic tungod sa kahadlok nga mahutdan og tubig nga mainom.
Matud ni Castro, wala pay report nga nagpakita nga adunay mahitabo nga kakulangon sa suplay sa mainom nga tubig, busa wala niya girekomenda ang pagtipig og daghang bottled water sa pagkakaron.
Pagpaklaro usab sa opisyal nga dili makahatag og kaayohan ang panic buying ug sobra nga pagtipig og tubig sa merkado, tungod kay mahimo kini nga hinungdan sa pagsaka sa presyo sa maong produkto.
Samtang,gipahibalo sa National Water Resources Board o NWRB nga ipaubos niini ang water allocation alang sa Metro Manila gikan sa 52 hangtod 53 cubic meters per second ngadto sa 44 cubic meters per second.
Padayon usab nga gibantayan sa mga ahensya sa gobyerno ang kahimtang sa suplay sa tubig ug ang posibleng epekto sa Super El Niño aron maandam ang mga angay nga lakang.
