Gihagit ni kanhing security aide ni ex-House Speaker Lord Allan Velasco nga si Rodulfo Gracioso Jr. si Vice President Sara Duterte ug Velasco nga moagi og lie detector test aron, matud pa niya, mapamatud-an kung kinsa ang nagsulti sa tinuod.
Miadto si Gracioso sa National Bureau of Investigation o NBI karong Septiyembre 28, 2026 kauban si Fr. Flavie Villanueva, diin iyang gisumite ang iyang sinumpaang salaysay may kalabotan sa iyang mga alegasyon sa paghatod og dagkong kantidad sa kuwarta ngadto sa pamilyang Duterte.
Sumala sa iyang pahayag, giingong nakahatod siya og kuwarta nga mokabat sa kapin P2 bilyon ngadto kang Vice President Sara Duterte sa daghang higayon tali sa 2018 ug 2022, nga matud pa niya gihimo ubos sa mando ni Velasco.
Lakip sa iyang gisumite sa NBI ang mga litrato ug video nga matud pa niya nagsuporta sa iyang mga alegasyon.
Gipasabot usab ni Gracioso nga karon lamang siya mipadayag sa maong mga alegasyon tungod sa iyang giingong kasinatian human siya ug iyang amahan nasakit ug wala kuno siya natabangan.
Samtang, gipanghimakak sa kampo ni Velasco ang mga alegasyon ni Gracioso ug miingon nga dili tinuod ug himo-himo lamang ang iyang mga pahayag. Gipanghimakak usab ni Vice President Sara Duterte ang mga alegasyon ug giingon nga dili niya kaila si Gracioso.
Sa pagkakaron, padayon nga gisusi sa NBI ang mga alegasyon ug mga dokumentong gisumite ni Gracioso, samtang nagkalahi ang mga pahayag sa duha ka kampo bahin sa maong isyu.
