Gibutyag ni kanhing senador Antonio Trillanes IV ang alegasyon nga mokabat sa P181.6 milyon ang nadawat kuno sa mga miyembro sa pamilya Duterte gikan kang Samuel “Sammy” Uy, nga iyang giingong nalambigit sa ilegal nga droga sa Davao City.
Lakip sa maong kantidad ang kapin P22.3 milyon nga giingong nadawat ni Vice President Sara Duterte atol sa iyang pagserbisyo isip Davao City Mayor.
Matud ni Trillanes, tulo ka manager’s checks nga mokabat og P22.32 milyon ang nadawat kuno ni Sara tali sa 2011 ug 2013, diin ang matag tseke mokabat og kapin P7.4 milyon.
Apil usab sa iyang gipresentar ang giingong mga transaksyon ngadto sa ubang miyembro sa pamilya Duterte, lakip si kanhing Pangulong Rodrigo Duterte, Davao City Mayor Sebastian Duterte ug Davao City Representative Paolo Duterte.
Giklaro usab nga kabahin sa giingong financial trail ang mga rekord nga gisumite ngadto sa Anti-Money Laundering Council o AMLC alang sa verification.
Nakapanghimatuud kaniadto ang AMLC nga adunay mga transaksyon nga gitumbok sa affidavit ni Trillanes nga nagtugma sa ilang mga rekord, lakip ang pipila ka deposito nga nalambigit kang Sara Duterte.
Samtang, nagpabiling alegasyon ni Trillanes ang maong mga pag-angkon ug nagpadayon ang pagsusi sa financial records isip kabahin sa impeachment case batok sa Bise Presidente.
