Paspas ang pag-uswag sa konstruksyon sa China sa Antelope Reef sa Paracel Islands, diin makita ang nagpadayong trabaho sa usa ka runway nga gilauman sa mga analyst nga mahimong mahuman sa tunga-tunga sa 2027.
Makita sa lugar ang grading works, mga tapok sa graba ug konkretong materyales, ingon man mga compaction crane nga gigamit sa pagpalig-on sa pundasyon sa runway.
Gisubay usab ang pag-abot sa usa ka gravel barge ngadto sa bag-ong gitukod nga wharf, nga nagpakita sa nagpadayong pagpalapad sa pasilidad sa maong reef.
Sumala sa mga security analyst ug military officials, mahimong importante nga offshore military base sa China ang Antelope Reef kon makompleto ang proyekto.
Makapalapad kini sa operasyon sa Chinese naval vessels ug military aircraft sa West Philippine Sea.
Apan wala giila sa China nga military base ang gitukod nga pasilidad sa maong lugar.
Hinuon, giingon sa state media sa China nga mahimong gamiton ang lugar alang sa civilian purposes sama sa weather forecasting, maritime activities ug scientific research.
Samtang, ang Paracel Islands giangkon usab sa Vietnam ug Taiwan, samtang padayon nga ginasubay sa mga analyst ang mga kalihokan sa lugar tungod sa posibleng epekto niini sa presensya sa China sa West Philippine Sea.
