DAVAO CITY – Gitambagan ni Eleonor Calderon, chief of operations sa Land Transportation Office (LTO) ang mga motorista nga kinahanglan magbinantayon ug maghinay sa pagmaneho samtang anaa sa kadalanan.
Tipik lamang ang pahayag sa opisyal dungan sa pagsaulog karong bulana sa Road Safety and Road crash prevention month.
Sumala sa opisyal nga kung hisgutan sumala pa ang mga aksidente sa kadalanan, mas taas ang ihap sa mga motorsiklo nga malambigit niini matag tuig.
Samtang gibutyag sab ni Atty. Gomer Dy, regional director sa LTO 11, nga dako sumala pa ang mga natabang sa mga polisiya dinhi sa dakbayan sama na lamang sa istrikto nga pagpatuman sa speed limit.
Gani ubos sumala pa ang ilang natala nga mga apprehensions sa siyudad gumikan sa hugtanon nga pagpatuman sa mga polisiya.
Mihatag sab ug katin-awan ang opisyal nga hangtud karon pabilin pa gihapon nga ginadili ang pagsakay sa likod sa mga pick-up truck gawas lamang kadtong mga nagdala ug relief goods alang sa mga nabiktima sa kalamidad apan kinahanglan pa gihapon nga mokuha ang mga nahisgutan ug permit.
