Makasinati og pag-ulan ug pagkulog-pagkilat ang pipila ka bahin sa Visayas ug Mindanao karong Huwebes tungod sa trough o ikog sa Tropical Storm Choi-Wan nga gibantayan sa gawas sa Philippine Area of Responsibility o PAR.
Lakip sa mahimong maapektuhan sa dag-om nga kalangitan, kalat-kalat nga pag-ulan ug thunderstorms ang Eastern Visayas, Caraga ug Davao Oriental.
Samtang, partly cloudy ngadto sa cloudy nga panahon, uban ang isolated rain showers o thunderstorms, ang gilauman sa Northern Mindanao ug sa ubang bahin sa Davao Region.
Sa pinakabag-ong monitoring sa state weather bureau, anaa ang bagyo sa kapin 2,945 kilometro silangan sa Central Luzon, nga adunay kusog sa hangin nga moabot sa 75 kilometros matag oras ug pagbugso nga hangtod 90 kilometros matag oras.
Naglihok ang Choi-Wan paingon sa west-northwestward sa gikusgon nga 15 kilometros matag oras.
Sa laing bahin, partly cloudy ngadto sa cloudy nga panahon, uban ang posibilidad sa localized rain showers o thunderstorms, ang mahimong masinati sa Metro Manila ug sa ubang bahin sa nasud.
Mahinay ngadto sa kasarangang hangin ang kasinatian sa tibuok nasud, samtang medyo ngadto sa kasarangan ang kahimtang sa kadagatan.
Padayon nga gibantayan sa state weather bureau ang lihok sa Tropical Storm Choi-Wan ug ang posibleng epekto sa trough niini sa panahon sa nasud.
