Gipirmahan na ni Pangulong Ferdinand “Bongbong” Marcos Jr. ang absolute pardon alang kang Mary Jane Veloso, nga kapin 14 ka tuig nga napriso sa Indonesia human siya masentensiyahan og kamatayon sa kaso nga may kalabotan sa drug trafficking.
Napriso si Veloso sa Indonesia sukad 2010 ug hapit na unta ipatuman ang iyang sentensiya nga kamatayon pinaagi sa firing squad niadtong 2015.
Naluwas siya sa maong silot human nangayo og konsiderasyon si kanhing Pangulong Benigno Aquino III kang kanhing Indonesian President Joko Widodo alang sa pagpadayon sa kaso batok kaniya.
Kahinumduman nga giingong biktima si Veloso sa human trafficking, human siya nadakpan tungod sa droga nga anaa sa iyang bagahe sa dihang miabot siya sa Indonesia.
Human sa dugay nga negosasyon tali sa Pilipinas ug Indonesia, nauli si Veloso sa Pilipinas niadtong Disyembre 2024 ug temporaryong gipahimutang sa Correctional Institution for Women sa Mandaluyong.
Pinaagi sa absolute pardon, gihatagan si Veloso og hingpit nga kapasayloan sa iyang silot, nga nagtangtang sa mga legal nga epekto sa iyang sentensiya ubos sa pardon nga gihatag sa Pangulo.
Sa maong lakang, na-ablihan usab alang kang Veloso ang higayon nga makabalik sa iyang pamilya human sa kapin usa ka dekada nga pagka priso sa Indonesia.
