Gibutyag ni Atty. Tony La Viña, spokesperson ni Senator Loren Legarda, nga dili mahimong awtomatikong manubag ang senador sa mga giingong ilegal nga kalihokan sa iyang anak nga si Batangas 1st District Representative Leandro Leviste tungod lamang sa ilang relasyon isip inahan ug anak.
Sumala ni Atty. La Viña, gikinahanglan ang aktuwal ug konkretong ebidensya aron mapamatud-an nga adunay ilegal o improper nga gihimo si Legarda may kalabotan sa solar power business sa iyang anak.
Gisupak usab sa abogado ang pagbase sa kaso sa gitawag niyang “accusation by affiliation,” o ang paghatag og sala o responsibilidad sa usa ka tawo tungod lamang sa iyang koneksyon sa indibidwal nga giimbestigahan.
Dugang pa niya, dili tungod kay inahan si Legarda ni Leviste, awtomatiko nang manubag ang senador sa mga alegasyon batok sa iyang anak.
Samtang, gilimod usab ni La Viña ang alegasyon nga adunay government money nga gigamit, gisayang o gikawat si Leviste may kalabotan sa mga solar project.
Gipatin-aw usab niya nga wala’y “ghost electricity” ug wala usab kuno nagbaton og monopoly si Leviste sa mga solar service contracts.
Gipasabot pa ni La Viña nga ang franchise sa Solar Para sa Bayan kay “ipso facto revoked” ug wala kini mapatuman, busa wala usab, matud pa niya, nahitabo nga pagkawala o pinansyal nga kadaot sa gobyerno.
Dugang pa niya, wala usab gipagawas sa gobyerno ang gikinahanglang rules and regulations ug ang mga lugar diin mahimong ipatuman ang maong solar franchise.
Kahinumduman nga giimbestigahan sa Ombudsman si Legarda ug Leviste may kalabotan sa mga solar project nga adunay gibanabanang kantidad nga P10 bilyon.
Gimandoan usab sa Ombudsman ang mag-ina nga mosumite sa ilang counter-affidavits isip kabahin sa preliminary investigation sa maong mga alegasyon.
