Gumikan kay determinado ang lokal nga panggamhanan nga ipatuman ang High Priority Bus System (HPBS), kapin 7,000 public utility jeepneys (PUJs) ang hulipan ug kapin kun kulang 1,000 buses.
Atol sa iyang State of the City Address (Soca), gikanayon ni Mayor Sara Duterte-Carpio nga prayoridad sa lokal nga panggamhanan ang pagpatuman sa HPBS isip solusyon sa nagkagrabe nga trapiko sa dakbayan.
Gitataw sa Mayor nga gikan sa 120 hangtud 130 PUJ routes, moubos na lamang kini sa 29 routes sa higayon nga ipatuman na ang HPBS.
Gikanayong ang bag-ong bus system ang adunay sumala pay Automatic Fare Collection aron nga dili na malisdan pa ang mga commuters.
Ayha sugdan ang maong proyekto, gi-aprubahan sa City Council ang P100-milllion fund ilalom sa 2019 Supplemental Budget 1 alang sa first stage sa HPBS.
Kalakip sab sa Supplemental Budget ang financial assistance alang sa mga maapektohan nga mga PUJ operators ug drivers.
Gitataw sab sa Mayor nga ang pagpatuman sa HPBS ang nanginahanglan sab ug dugang nga pondo.
Sa kasamtangan, gipatuman sa siyudad ang Extended-Peak Hours Augmentation Bus System (Phabs) diin adunay gipakatag nga mga bus sa areas nga adunay kakulangon sa dyip sama sa Toril, Catalunan Grande, Ulas, Buhangin ug Panacan.
