Gihagit ni Senator Panfilo “Ping” Lacson si Department of Public Works and Highways Secretary Vince Dizon nga ipasabot kung giunsa pag-apil sa billing reports sa usa ka proyekto sa Taguig ang mga geotagged nga litrato nga nagtudlo sa Tacloban City, Leyte.
Gipunting ni Lacson ang findings sa mismong DPWH sa Contract ID 220B0106, diin nakit-an sa inspection report nga ang coordinates sa mga geotagged nga litrato nga gilakip sa billing reports anaa sa gawas sa aktuwal nga project limits.
Sumala sa mga dokumentong iyang gihisgutan, adunay metadata ang mga litrato nga nagtudlo sa lokasyon sa Leyte, nga iyang gipangutana kung giunsa kini pagkahimong dokumentasyon alang sa usa ka proyekto sa Taguig.
Gipunting usab ni Lacson ang 15 porsyentong advance payment nga mokabat sa P13.738 milyon nga gi-release niadtong Hunyo 23, 2022, diin ang mga billing photographs adunay coordinates nga nagtudlo sa Tacloban City.
Dugang pa sa senador, ang maong finding angay ikonsiderar ilawom sa iyang pagkuwestiyon sa pahayag ni Dizon nga walay ghost projects sa Taguig.
Sa Senate finance subcommittee hearing, miingon si Dizon nga wala’y nakita nga ghost project sa maong siyudad base sa ilang imbestigasyon.
Lakip usab sa iyang gipunting ang resulta sa AI-based image similarity detection sa DPWH sa mga billing photographs sa Taguig projects gikan 2017 hangtod 2025.
Sa 15,523 ka litrato nga gisusi, 1,079 ka pares ang na-flag tungod sa taas nga visual similarity, nga sakop sa 180 ka kontrata.
Gipahinumdoman usab ni Lacson nga nakapasa na siya ug iyang team og labing menos 45 ka case studies ngadto sa Office of the Ombudsman may kalabotan sa ilang giingong mga iregularidad sa flood control projects sa Taguig.
Sa pagkakaron, nagpadayon ang fact-finding investigation sa Ombudsman may kalabotan sa mga alegasyon, samtang gihagit ni Lacson ang DPWH nga ipasabot ang kalainan tali sa pahayag sa ahensya ug sa mga findings nga makita sa ilang mga inspection report.
