DAVAO CITY – Mas gipalig-on sa lokal nga kagamhanan ang anti-polio program niini isip tubag sa outbreak nga gideklara sa Department of Health (DOH).
Gikanayon ni Davao City Health Office (CHO) chief, Dr. Josephine Villafuerte, hinanaling milihok ang ilang buhatan human masuta ang resulta sa water sampling nga gikuha sa Research Institute for Tropical Medicine (RITM) niadtong Agosto 22, 2019.
Gisusi na usab sumala pa sa CHO ang mga komunidad nga adunay posibling mga kaso sa polio aron mapugngan ang pagkaylap sa maong virus.
Bisan ug wala pay gikareport nga kaso sa polio sa syudad, mipahimangno si Villafuerte nga kinahanglang magpabiling magbinantayon ang publiko ug mosunod sa gipatumang mga preventive measures.
Gitapok na usab sa CHO ang tanang mga nanag-iya ug resorts, mga kapitan sa coastal barangay ug kadtong mga anaa duol sa sapa aron ipahibalo pa-unsa sila makatabang sa pagpugong sa pagkaylap sa polio virus.
Gilauman usab nga palapdan pa sa CHO ang anti-polio vaccination niini.
