Nanawagan si Pangulong Ferdinand Marcos Jr. og mas hugot nga mga lakang aron masiguro ang kaluwasan sa mga estudyante sulod sa mga eskwelahan, human sa pagpamusil sa Banga National High School sa South Cotabato.
Gipasiugda sa Presidente nga dili angay mahimong normal nga bahin sa kinabuhi sa mga batang Pilipino ang bayolente ug pagpamusil sulod sa eskwelahan.
Matud pa ni Marcos, katungod sa mga bata nga makakat-on nga walay kahadlok, samtang katungod usab sa mga ginikanan nga ipadala ang ilang mga anak sa eskwelahan nga masaligon nga makapauli silang luwas.
Gimando sa Presidente ang usa ka masusing imbestigasyon sa insidente, lakip ang pagsusi kung giunsa pagkuha ug pagdala sa usa ka menor de edad og armas sulod sa eskwelahan.
Nagpaabot usab si Marcos og pahasubo sa mga pamilyang namatyan sa ilang mga minahal ug mipasalig nga mahatagan og gikinahanglang pagtambal ug tabang ang mga nasamdan.
Sumala sa Presidente, ikatulo na kini nga insidente sa makamatay nga pagpamusil sulod sa eskwelahan sa milabay nga tulo ka bulan, human sa mga insidente sa Tacloban ug Zamboanga.
Kalabot niini, gimando ni Marcos ang Department of Education o DepEd, Department of the Interior and Local Government o DILG, ug Philippine National Police o PNP nga mopasa og report bahin sa mga lakang nga ilang gipatuman human sa mga nangaging insidente.
