Gibutyag ni DILG Secretary Jonvic Remulla nga giingong na-expose sa deep dark web ang menor de edad nga suspek sa pagpamusil sa Banga National High School sa South Cotabato, ug nakit-an usab sa iyang cellphone ang mga sulat bahin sa iyang depression.
Matud ni Remulla, giingong nakaimpluwensya sa suspek ang iyang kalambigit sa online content nga may kalabotan sa kapintas ug mga krimen.
Gipunting sa kalihim ang sayon nga access sa mga bata sa social media ug internet isip usa sa mga butang nga angay tutokan human sa maong insidente.
Gipahibalo usab ni Remulla nga makigtagbo siya sa Department of Information and Communications Technology o DICT ug Kongreso aron hisgutan ang posibleng mga lakang sa paglimitahan sa paggamit sa social media sa mga menor de edad.
Gihangyo usab niya ang mga ginikanan nga mas hugot nga bantayan ang online activities sa ilang mga anak, lakip ang mga tawo ug grupo nga ilang kauban sa internet.
Samtang, gipatin-aw ni Remulla nga walay plano ang DILG nga limitahan ang media sa pagpaambit sa impormasyon bahin sa mga kritikal nga insidente.
Matud niya, importante nga mahibal-an sa publiko ang tinuod nga nahitabo ug ang mga angay ug dili angay buhaton atol sa maong mga panghitabo.
Sa Banga shooting, tulo ang namatay lakip ang giingong suspek, samtang walo ka estudyante ang nasamdan. | VIA BOMBO EROS PAJOTA
