Miadto sa Banga, South Cotabato si Department of Social Welfare and Development o DSWD Secretary Rex Gatchalian kaniadtong Domingo, Septyembre 20, 2026 aron personal nga masusi ang kahimtang sa mga biktima sa pagpamusil sa Banga National High School.
Gibisita ni Gatchalian ang mga ospital diin gitambalan ang mga nasamdan ug nakigkita sa mga pamilya sa mga namatay.
Pagpasalig sa kalihim nga abagahon sa DSWD ang mga bayrunon sa pagpaospital sa mga biktima ug hatagan usab og dugang suporta ang ilang mga pamilya.
Lakip sa tabang ang psychological first aid ug uban pang psychosocial support alang sa mga naapektuhan sa insidente.
Gipahibalo ni Gatchalian nga mando mismo ni Pangulong Ferdinand “Bongbong” Marcos Jr. ang paghatag sa tanang gikinahanglang tabang ug suporta sa mga biktima ug ilang pamilya.
Samtang, gisuspenso karong Lunes ang face-to-face classes sa tanang lebel sa pipila ka lugar sa South Cotabato isip lakang sa pag-amping human sa insidente.
Apil sa nagpatuman sa class suspension ang Banga, Surallah, Norala, Sto. Niño ug Koronadal City.
Nagpadayon ang DSWD sa koordinasyon sa LGU sa Banga ug school officials alang sa dugang nga suporta sa mga estudyante nga naluwas ug mga pamilyang naapektuhan.
