Gituohan ni University of the Philippines College of Law Assistant Professor Atty. Michael Tiu Jr. nga posibleng estratehiya sa defense team ang personal nga pag-atubang ni kanhing Pangulong Rodrigo Duterte sa International Criminal Court o ICC.
Mitungha si Kanhi Duterte sa personal atubangan sa ICC niadtong Septiyembre 16 alang sa ikatulong status conference sa iyang giatubang nga kaso nga crimes against humanity. Kini ang unang higayon nga personal siyang mitungha atubangan sa mga huwes sa ICC sukad sa iyang pagdakop niadtong Marso 2025.
Matud pa ni Tiu, posibleng kabahin kini sa lakang sa bag-ong lead counsel sa depensa aron masusi pag-ayo sa mga huwes sa ICC ang kahimtang sa panghunahuna o cognitive status ni Duterte.
Dugang pa niini, posible usab, matud pa sa eksperto, nga paagi kini sa defense team aron ipakita sa korte nga dili maayo ang mental o cognitive condition ni Duterte aron makaatubang ug hingpit nga makasabot sa mga proseso sa iyang pagtaral nga gikatakdang magsugod sa Nobyembre 30.
Ang ICC mismo kaniadto nakadesisyon nga si Duterte angay nga makaapil sa mga proseso sa kaso, base sa assessment sa independent medical experts. Kahinumduman nga una nang gipahayag sa mga abogado ni Duterte nga nag-antos siya og grabe nga memory loss, diin giingong naapektuhan usab ang iyang abilidad sa paghinumdom sa mga ngalan sa iyang kaugalingong mga abogado.
Sa kasamtangan, nagpabiling nakaeskedyul sa Nobyembre 30, 2026 ang pagsugod sa pagtaral ni Duterte sa ICC. Mao usab kini ang unang higayon nga makita sa publiko si Duterte sa personal sukad niadtong Marso 14, 2025, human siya madakpi sa Pilipinas ug gidala ngadto sa The Hague aron atubangon ang mga kaso batok kaniya.
