Gihangyo ni Interior Secretary Jonvic Remulla ang hugot nga paglimit sa social media sa mga bata ug pagharang sa mga website nga nagpalambo og kapintas human sa pagpamusil sa Banga National High School sa South Cotabato.
Atol sa press conference, iyang giingon nga dad-on niya sa Kongreso ang mga lakang aron malimitahan ang social media access sa mga batang 16-anyos paubos, apil ang mas hugot nga regulasyon sa legal ug loose firearms.
Gusto usab niya nga hatagan og kahigayunan ang Philippine National Police o PNP nga makainspeksyon sa mga lisensyadong armas sa mga panimalay basta adunay pahibalo daan ug dili kinahanglan og warrant.
Dugang pa, gipangayo niya nga babagan pinaagi sa Department of Information and Communications Technology o DICT ang access sa mga website nga nagpalambo og nihilism ug kapintas.
Nasuta sa mga imbestigador nga na-expose sa online content ang estudyanteng nalambigit sa Banga shooting, ug padayon pang gisusi kon unsa ka dako ang impluwensya niini sa iyang gihimo.
Samtang, padayon ang PNP sa pag-imbestiga sa online activity ug pag-access sa armas sa estudyante.
Tulo ang namatay, lakip ang gunman, ug walo ang nasamdan sa maong pagpamusil niadtong Setyembre 18.| VIA BOMBO EROS PAJOTA
