Nagtestigo karong adlawa si Securities and Exchange Commission o SEC Company Registration and Monitoring Department Director Atty. Gerardo Fernando Del Rosario atol sa ika-27 nga adlaw sa impeachment trial ni Vice President Sara Duterte.
Gipresentar si Del Rosario sa House Prosecution isip saksi ubos sa Article II sa impeachment complaint, diin gisusi ang mga corporate records ug business interests nga may kalabotan sa Bise Presidente.
Kapin 200 ka exhibits nga naglangkob sa sobra 3,000 ka pahina ang giandam alang sa iyang testimonya.
Gipadayag ni Del Rosario nga base sa Article 7, Section 13 sa 1987 Constitution, dili mahimong mag-engage sa negosyo o magbaton og business interest ang Presidente, Bise Presidente, Cabinet members ug ilang deputies samtang naglingkod sa ilang posisyon.
Gisusi usab sa prosekusyon ang mga corporate records aron itandi sa mga deklarasyon ni VP Sara sa iyang SALN ug sa mga interes niini sa nagkadaiyang kompanya.
Apan, misupak ang defense lawyer nga si Atty. Justin Nicol Gular sa pag-identify ug authentication sa mga corporate documents sa Pikimong-Pikimong Philippines Corporation ug JTC Group of Companies, nga iyang gipasabot nga naapil sa mga dokumentong dili na angay ikonsiderar base sa naunang ruling sa impeachment court.
Samtang, wala na ipresentar sa prosecution si CSC Assistant Commissioner Atty. Ariel Ronquillo tungod kay giingon ni Rep. Terry Ridon nga nasaklaw na sa testimonya sa mga naunang saksi ang mga isyu nga iyang unta hisgutan.
Gibalhin usab sa prosecution ngadto ugma ang testimonya ni Philippine Government Electronic Procurement System Division Chief Rendell Sopeña, nga gilauman nga motestigo kabahin sa mga government procurement transactions nga may kalabotan sa mga kompanyang ideklarang adunay interes ang Bise Presidente.
