DAVAO CITY – Gisugdan na karong adlawa ang 21st Davao Agri Trade Expo (DATE) nga gipahigayon sa usa ka mall dinhi sa syudad sa Davao.
Gipasigarbo gayud ni Davao City Chamber of Commerce Inc. (DCCCI) Executive Vice President John Tria nga ang nasangpit nga aktibidad mao ang biggest and longest-running agri-business expo nga ginapahigayon matag tuig sa Southern Philippines.
Gipasundayag sa maong trade expo ang mga micro, small and medium enterprises o MSMEs ug noybenta (90) ka mga lokal ug internasyonal nga kompanya.
Gikanayon ni Valente Turtur, Cacao Industry Development Association of Mindanao (Cidami) president ug chairman sa maong event nga gusto sab matud pa nila nga magpokus sa pagpa-uswag sa agrikultura ilabi na sa Mindanao gumikan usa kini sa maghatag og abunda sa nasud ug aron sab nga mahimong tinoud nga “Basket of the Philippines”.
Sa nasangpit nga expo, adunay mga libre nga technical seminars kalabot sa agri-fishery, aquaculture, breed development, mushroom production, potential of dairy products ug wild life trade.
Pagahisgutan sab matud pa ang kontrobersyal nga African Swine Fever.
Subay niini, misalmot sa maong kalihokan si Davao City Mayor Sara Duterte-Carpio ug si Senator Cynthia Villar nga mikaon pa og lechon sa gi-andam nga boodle fight aron ipakita nga luwas gikan sa African Swine Fever (ASF) virus ang karneng baboy nga gikan dinhi sa syudad.
Mulungtad hangtud sa Setyembre 28 ang maong expo kung diin daghanang mga stakeholders sa sektor sa agrikultura ang gidapit.
