Gipahugtan sa Senado ang mga lakang sa seguridad samtang nagpaabot sa pagtubag ni Vice President Sara Duterte sa Articles of Impeachment sa wala pa ang alas-7 sa gabii sa Hunyo 1.
Sumala sa Senado, mahimo lamang isumite sa Bise Presidente ang iyang tubag pinaagi sa personal nga pag-file, pinaagi sa abogado, o pinaagi sa electronic mail. Nahinumduman nga nadawat ni Duterte ang summons niadtong Mayo 20, duha ka adlaw human mag-convene ang Senado isip impeachment court.
Tungod sa gilaumang pagdagsa sa media ug mga supporters ug kritiko sa Bise Presidente, naglatag ang Office of the Senate Secretary og mga panudlo alang sa media coverage ug mga lugar diin mahimong magpahigayon og press briefing ang kampo ni Duterte.
Nakigkoordinar usab ang National Capital Region Police Office sa Office of the Sergeant-at-Arms aron masiguro ang kahapsay ug seguridad sa palibot sa Senado, diin pipila na ka semana nga adunay gipahimutang nga mga pulis tungod sa mga protesta nga may kalabutan sa impeachment case.
Samtang, ubos sa Rules of Procedure on Impeachment Trial, adunay lima ka adlaw ang prosecution panel sa pagsumite sa ilang reply human madawat ang tubag sa Bise Presidente. Gilauman usab nga magsugod ang impeachment trial sa Hulyo 6.
