Napakyas sa pag-angkon sa kampeonato sa Britain’s Got Talent Season 19 ang Filipino singer nga si Matty Juniosa human mosangko lamang sa ika-upat nga puwesto sa grand finale nga gipahigayon niadtong Mayo 30 sa United Kingdom.
Sa maong kompetisyon, gihatud ni Juniosa ang iyang bersyon sa awiting “Nothing Compares 2 U” ni Sinéad O’Connor. Bisan pa man sa iyang kusog nga pasundayag, ang Hawkstone Farmers Choir maoy nakadaog sa kampeonato, samtang ikaduha ang Celestial ug ikatulo ang dance duo nga Anastasiia and Salsa.
Nahimong usa sa mga pinakabantugang contestant sa maong season si Juniosa human makadawat og duha ka Golden Buzzer. Sa iyang audition, nakuha niya ang Golden Buzzer ni judge Simon Cowell pinaagi sa iyang pag-awit sa “Purple Rain” ni Prince nga nakapasulod dayon kaniya sa semifinals.
Sa semifinals, nakadawat na usab siya og Golden Buzzer gikan kang Amanda Holden human sa iyang pagpasundayag sa “Dream On” sa Aerosmith nga maoy nakadala kaniya ngadto sa final round sa kompetisyon.
Si Juniosa nga taga-Mandaluyong City unang nailhan isip contestant sa Idol Philippines niadtong 2019 ug nahimong miyembro sa vocal trio nga iDolls. Niadtong 2022, mibalhin siya sa Scotland aron magtuon og musical theater ug nakatambong na sa daghang stage productions, lakip ang Kinky Boots. Gilauman usab nga makita siya sa papel ni Annas sa West End production sa Jesus Christ Superstar.
