Nagdeploy og dugang nga pwersa ang 10th Infantry “Agila” Division sa Philippine Army aron palig-onon ang security operations alang sa BARMM Parliamentary Elections sa September 14.
Gikan ang dugang nga tropa sa 67th Infantry “Agila” Battalion ug 102nd Division Reconnaissance Company, nga gipadala human sa send-off ceremony sa Camp General Manuel T. Yan Sr. sa Mawab, Davao de Oro.
Sumala sa 10th Infantry Division, mokabat sa 395 ka sundalo ang gipadala aron mosuporta sa mga tropang anaa na sa Bangsamoro region.
Ang 67th Infantry Battalion motabang sa security operations sa Central Mindanao, samtang ang 102nd Division Reconnaissance Company ipadala sa Basilan.
Tumong sa deployment nga mapalig-on ang seguridad sa mga polling area ug maseguro nga luwas, malinawon, hapsay ug kasaligan ang electoral process.
Gipahinumdoman ni 10th Infantry Division commander Maj. Gen. Alvin Luzon ang mga sundalo nga ipadayon ang disiplina, professionalism, impartiality ug non-partisanship sa ilang election duties.
Gipasabot usab niya nga responsibilidad sa militar ang pagtabang sa pagpanalipod sa katungod sa matag botante nga makabotar nga gawasnon ug walay kahadlok.
Padayon ang koordinasyon sa Army sa security units ug election authorities samtang nagkaduol ang unang regular BARMM parliamentary elections.| VIA BOMBO EROS PAJOTA
