Nangayo og suporta si Education Secretary Sonny Angara sa Senado aron maibalik ug madugangan ang pondo sa Department of Education (DepEd) sa sunod tuig, lakip ang mga programa alang sa pagkat-on sa mga estudyante, kaayohan sa mga magtutudlo, ug pagpaayo sa mga pasilidad sa mga eskwelahan.
Atol sa paghisgot sa Senate Finance Committee sa gisugyot nga budget sa ahensiya niadtong Biyernes, Oktubre 16, nangayo ang DepEd og dugang nga 147.93 bilyong piso aron pondohan ang mga importanteng programa ug serbisyo nga wala hingpit nga nasakop sa gisugyot nga nasudnong budget.
Ubos sa General Appropriations Bill (GAB), gigahin ang 969.79 bilyong piso alang sa DepEd ug sa mga attached agency niini, nga mas ubos og 6.17 bilyong piso kon itandi sa orihinal nga gisugyot ubos sa National Expenditure Program (NEP).
Sa paghisgot sa Senado, gisugyot ang paghatag og lahi-lahing alokasyon alang sa mga programa aron masiguro ang mas klaro ug transparent nga pagbahin ug paggamit sa pondo.
Samtang, giaprobahan sa Senate Finance Committee ang gisugyot nga budget sa DepEd, uban sa pipila ka kondisyon kalabot sa dugang nga mga panaghisgot ug pagsumite sa mga dokumentong gikinahanglan.
Nagpadayon ang DepEd sa paglaom sa suporta sa mga senador aron matubag ang kakulang sa pondo ug mapatuman ang mga programa nga nagtumong sa pagpauswag sa kalidad sa edukasyon sa nasud.
