Gisugdan na karung Lunes ang bail hearing sa plunder case batok kang kanhing House Speaker Martin Romualdez sa Sandiganbayan Third Division, diin mitambong siya pinaagi sa video conference gikan sa New Quezon City Jail sa Barangay Payatas.
Pinaagi usab sa layo nga pamaagi, mipirma si Romualdez sa pretrial order samtang anaa sa kustodiya sa Bureau of Jail Management and Penology.
Gikatakdang magpresentar ang prosekusyon og 23 ka testigo atol sa bail hearing nga himoun matag Lunes, Martes ug Huwebes.
Ang plunder usa ka kasong dili basta-basta tugotan og piyansa. Mahimong mahatagan og temporaryong kagawasan ang akusado kung mapamatud-an sa bail hearing nga dili lig-on ang ebidensiya sa iyang pagkasad-an.
Kahinumdoman nga kaniadtong Septiyembre 7, nagpagawas ang Sandiganbayan og arrest warrant batok kang Romualdez, kanhing Ako Bicol Representative Zaldy Co ug duha pa ka indibidwal tungod sa giingong ₱7.44-bilyon nga plunder scheme.
Giakusahan sa prosekusyon nga gikan ang maong kantidad sa mga kickback nga gibayad sa mga kontratista ug uban pang indibidwal ug entidad nga adunay interes sa flood control, imprastraktura ug uban pang proyekto sa gobyerno nga gipondohan ubos sa General Appropriations Acts sa mga tuig 2022 hangtod 2025.
Gidala sa New Quezon City Jail-Male Dormitory si Romualdez kaniadtong Septiyembre 14 human maospital sulod sa hapit usa ka semana. Una na usab kini nagpahayag nga dili siya sad-an sa maong kaso.
