Gipahayag ni Ombudsman Jesus Crispin “Boying” Remulla nga hapit na mapasaka ang mga kaso batok kang Senador Loren Legarda ug Batangas 1st District Representative Leandro Leviste may kalabotan sa mga alegasyon nga giimbestigahan sa Office of the Ombudsman.
Atol sa press briefing, gipatin-aw ni Remulla nga gilauman ang pagpasaka sa mga kaso sa Sandiganbayan, bisan wala pa matino ang eksaktong petsa sa pagsumite niini.
Giklaro usab sa Ombudsman nga anaa na sa hugna sa preliminary investigation ang mga reklamo batok sa mag-inang mambabalaud.
Dugang pa niya, ipahibalo sa publiko ug sa mga tigbalita ang dugang detalye sa dihang pormal nang mapasaka ang mga kaso.
Kahinumduman nga nalambigit si Legarda ug Leviste sa mga alegasyon may kalabotan sa solar energy business ni Leviste ug sa giingong kapakyasan sa pagtuman sa mga obligasyon sa kompanya ubos sa gihatag nga prangkisa.
Sa pagkakaron, nagpadayon ang proseso sa Ombudsman samtang gihulat ang pormal nga pagpasaka sa mga kaso ug ang dugang detalye sa imbestigasyon.
