Gipasiugda sa depensa ni Vice President Sara Duterte nga kinahanglan gihapon silang hatagan og higayon sa pagtubag sa mga alegasyon nga giatras sa prosecution panel human na kini makapresentar og ebidensya atol sa impeachment trial.
Gipatin-aw ni defense counsel Atty. Michael Poa nga prerogatiba sa prosecution ang pag-atras sa tulo ka articles of impeachment, apan kinahanglan usab nga makapresentar ang depensa sa ilang kaugalingong ebidensya aron matubag ang mga alegasyon batok sa bise presidente.
Ang maong isyu mitumaw human mipili ang House prosecution panel nga ipadayon na lamang ang Article II nga may kalabotan sa giingong unexplained wealth, lakip ang mga alegasyon sa dili hingpit nga pagdeklarar sa mga kabtangan ug interes sa negosyo.
Giatras sa prosecution ang Article I nga may kalabotan sa confidential funds, Article III bahin sa bribery, ug Article IV kalabot sa grave threats batok kang Presidente Ferdinand Marcos Jr., sa First Lady ug kanhi House Speaker Martin Romualdez.
Gidawat sa Senate Impeachment Court ang pag-atras sa maong mga artikulo ug gitangtang usab ang sub judice restriction, nga nagtugot sa mga partido sa paghisgot sa mga alegasyon sa publiko.
Apan, nagpabilin ang pangutana kon unsaon pagtubag sa depensa sa mga ebidensya nga napresentar na alang sa duha sa mga giatras nga artikulo. Ang nahibiling kaso sa unexplained wealth mao na lamang ang ipadayon sa impeachment trial.
