Naka-alerto ang mga otoridad sa dapit sa Davao River sa Barangay Ma-a human ma-monitor kini sa Code Yellow o alert level, sumala sa weather update sa City Disaster Risk Reduction and Management Office Operations Center (CDRRMO-OPCEN) alas 12:00 sa tungang gabii niadtong Oktubre 15, 2026.
Samtang, nagpabilin sa Code Green o safe level ang bahin sa Davao River sa Barangay Tamugan, lakip ang mga suba sa Talomo, Lasang, Bunawan, Matina ug Lipadas.
Gibantayan sa CDRRMO-OPCEN ang kahimtang sa mga suba isip kabahin sa pagmonitor sa posibleng pagtaas sa tubig ug mga risgo nga mahimong dala sa kausaban sa panahon.
Matud sa weather update, ang Intertropical Convergence Zone o ITCZ maoy weather system nga nag-impluwensya sa kahimtang sa panahon sa siyudad.
Ang mga lugar sa Davao City nakasinati sa tin-aw hangtod partly cloudy ug cloudy nga kalangitan sa maong oras.
Sa baybayon, kalma ang dagat ug low tide ang kahimtang sa tubig sa panahon sa pagpagawas sa update.
Gidasig ang publiko, ilabina ang mga residente duol sa mga suba, nga magpabiling mabinantayon ug mosunod sa mga pahimangno sa lokal nga mga otoridad samtang nagpadayon ang pagmonitor sa kahimtang sa panahon ug lebel sa tubig.
