Miabot na sa 4.07 milyong metriko tonelada ang angkat nga bugas sa Pilipinas gikan Enero hangtod Septyembre ning tuiga, samtang nangandam ang gobyerno sa posibleng epekto sa El Niño sa lokal nga produksyon sa humay.
Base sa datos sa Bureau of Plant Industry o BPI, mas taas kini og 24 porsiyento kon itandi sa 3.28 milyong metriko tonelada nga naangkat sa susamang panahon niadtong miaging tuig.
Milabaw usab ang kasamtangang gidaghanon sa bugas nga naangkat sa tibuok tuig 2025, nga mikabat sa 3.39 milyong metriko tonelada.
Ang Vietnam nagpabiling nag-unang tinubdan sa imported rice sa Pilipinas, diin miabot sa 2.73 milyong metriko tonelada ang ilang suplay.
Gisundan kini sa Thailand ug Myanmar, samtang ang ubang suplay naggikan sa Cambodia, Pakistan, India, South Korea, Japan ug Italy.
Gilauman usab nga mahimong moabot sa lima ka milyong metriko tonelada ang kinatibuk-ang angkat sa bugas karong tuiga, isip lakang sa pagpalig-on sa buffer stock sa nasud ug pagpangandam sa posibleng pagkunhod sa lokal nga produksyon tungod sa El Niño.
Sumala sa Department of Agriculture, gipadayon ang pag-import aron masiguro ang igong suplay sa bugas atubangan sa gilaom nga hulaw ug kakulang sa produksyon.
Samtang, base sa Daily Price Index sa Department of Agriculture nga gilatid sa report, ang imported special rice nagkantidad na og 60 pesos ug 74 sentimos kada kilo, samtang ang premium rice anaa sa kapin 55 pesos kada kilo.
Ang well-milled rice anaa sa kapin 48 pesos kada kilo, samtang ang regular-milled rice nagkantidad og kapin 45 pesos kada kilo.
