Mitubag si National Bureau of Investigation (NBI) Director Atty. Melvin Matibag sa paghulagway kaniya ni Vice President Sara Duterte nga usa lamang siyang “nobody.”
Miangkon si Matibag nga mahimo siyang matawag nga “nobody,” ilabi na kon ang basihan mao ang pagpanag-iya og mansyon ug negosyo.
Matod pa niya, “nobody” usab siya kon ang basihan mao ang pagdawat og kuwarta gikan sa mga kompanyang gipanag-iya sa estado sa China.
Bisan pa niini, gipasalig ni Matibag nga magpadayon ang NBI sa pagtuman sa mandato niini ug dili hunongon ang imbestigasyon.
Kahinumdoman nga miingon si Bise Presidente Sara Duterte nga wala siyay interes sa maong direktor, human siya hagiton nga mosang-at og kaso kon sayop ang ilang ginahimong imbestigasyon.
Matod sa Bise Presidente, adunay mga angay nga forum sa Office of the Ombudsman ug sa Senate Impeachment Court diin mahimo niyang tubagon ang mga alegasyon kalabot sa iyang Statement of Assets, Liabilities, and Net Worth o SALN.
Sa miaging press conference sa NBI, giawhag ni Matibag ang Bise Presidente nga mosang-at og kaso ug idala sa hustong proseso ang iyang pagkuwestiyon sa ilang imbestigasyon.
