Giakusahan ni Senador Panfilo “Ping” Lacson si Senador Alan Peter Cayetano nga misulay sa pagpaliko sa isyu bahin sa mga alegasyon sa iregularidad sa mga proyektong pang-imprastraktura ug sa giingong ilegal nga reclamation sa Taguig, nga matod pa ni Lacson nagpakita lamang sa pagkataranta sa kaubang senador.
Sa pahayag ni Lacson niadtong Sabado, iyang gihisgotan ang pinakabag-ong Facebook Live ni Cayetano, diin miingon kini nga nakadawat siya og impormasyon nga adunay mga indibidwal nga giingong gipugos aron moangkon nga adunay mga iregularidad sa Taguig.
Gihagit ni Lacson si Cayetano nga nganlan ang mga indibidwal nga giingong iyang gihulga aron matubag niya direkta ug tagsa-tagsa ang mga alegasyon.
Una nang gisaway ni Lacson ang mga pahayag ni Cayetano bahin sa giingong demolisyon nga adunay motibong politikal, pagpakaylap sa sayop nga impormasyon ug paghimo og paghukom pinaagi sa publisidad.
Niadtong Septiyembre 3, miingon si Lacson nga daw nahadlok si Cayetano matag adunay mogawas nga ebidensiya sa korupsiyon sa Taguig.
Matod pa niya, daw makaluluoy na usab ang mga pahayag sa kaubang senador sa internet.
Samtang, kahinumdoman nga una nang gipadayag ni Lacson nga siya ug ang iyang grupo nagsumite sa Office of the Ombudsman og labing menos 45 ka case study, lakip ang mga opisyal nga dokumento, kalabot sa giingong sistematikong iregularidad sa mga flood control project sa Taguig.
Dugang pa ni Lacson, ang mga dokumentong ilang gisumite maoy hinungdan sa pagpahigayon sa Ombudsman og fact-finding investigation kalabot sa mga alegasyon.
Bag-ohay lang, nagpagawas usab si Lacson og video gikan sa composite inspection team nga giingong nagdokumento sa padayon nga ilegal nga reclamation sa bahin sa Laguna Lake nga sakop sa Taguig.
