DAVAO CITY – Dili tumang ka-dismaya ang gibati sa usaka inahan human daw wala sumala pa sila tagda sa kapulisan human magpa-blotter unta gumikan sa pagpangulata sa usaka Task Force Davao Member ngadto sa iyang anak kagabii.
Gikanayon ni Joan Marsado, taga Barangay Tomas Monteverde, Agdao ning syudad, nakuyapan ang iyang 14 anyos nga anak nga lalaki human gilaparo ug kusog kaayo sa wala pa nila maila nga sakop sa TFD.
Paspas usab sumala pa sila nga mikuha ug medical certificate aron mahimong lig-on ang ilang pagpa-blotter sa Sta. Ana Police station, apan gibalibaran sumala pa sila sa desk officer.
Sa dihang miadto sila sa TFD Headquarter sulod sa Sta. Ana wharf, ila pang nakita ang suspek apan kalit kining gitaguan sa iyang mga kaubanan ug wala gayud silay nahimo.
Dugang pa ni Joan Marsado nga hubog ang nahisgutang TF member.
Tungod niini, miduol ang inahan sa Bombo Radyo aron magpakitabang.
Desidido usab ang inahan nga idangop kang Mayor Inday Sara ang nahitabo sa iyang anak aron mahatagan ug leksiyon ang abusadong sakop sa Task Force Davao.
Saysay pa sa biktimang si Jan-Jan, 14 anyos, na-alaan sila sa TFD member nga apil sa mga batan-on nga nag-riot duol sa opisina sa Buruea of Fire Protection eleven sa may Monteverde, ug gidala sumala pa sila sa ngitngit nga bahin.
Dugang pa ni Jan-jan gisugo sila sa TFD member nga magsinagpaay, apan nasuko ang sundalo kay hinay kuno ang iyang sagpa hinungdan nga gilaparo siya niini ug nakuyapan.
Gikatarungan usab ni Janjan nga igo lamang sila naglabay ug basura ug milahos sa magsaysay park aron mopalit ug durian sa dihang nakit-an sa TFD member.
Kauban ni Janjan ang lain pang 14 anyos ug 18 anyos nila nga silingan niadtong tungura.
Wala man makuha sa mga biktima ang pangalan sa TFD member, apan gipaniguro sa mga minor de edad nga ila kining mailhan kung subli nilang makita.
