Gipadayag ni VP Sara Duterte nga “hinimo-himo” lamang ang impeachment case nga gisang-at batok kaniya sa House of Representatives of the Philippines, samtang mipadayag usab siya og pasalamat sa padayon nga suporta sa iyang mga supporters. Sumala pa sa Bise Presidente, daghan gihapon ang nagpadayon sa pagsalig ug pagtuo kaniya sukad pa sa iyang pag-anunsyo nga modagan isip Presidente sa 2028.
Lakip sa iyang gipasalamatan ang mga grupo nga walay pagduha-duha nga nagpakita og suporta pinaagi sa mga rally ug demonstrasyon batok sa impeachment proceedings. Dugang pa niini, gikanayon ni Vp sara, nga ang maong impeachment usa ka lihok nga gihimo batok kaniya, apan nagpabilin siyang lig-on tungod sa suporta sa publiko. Sa kasamtangan, iyang gibutyag nga nakigpulong siya sa iyang amahan nga si kanhing Rodrigo Duterte kabahin sa isyu nga iyang giatubang.Sumala pa kaniya, nagtuo silang duha nga ang tanang panghitabo sa kinabuhi kabahin sa plano sa Ginoo—lakip na kung siya ba ma-impeach o dili.
Sa pagkakaron, si VP Sara anaa sa The Hague aron bisitahon ang iyang amahan nga nag-atubang og kaso sa International Criminal Court tungod sa alegasyon nga crimes against humanity.Samtang nagpadayon ang isyu, gihisgutan usab sa Bise Presidente ang nagkagrabe nga kahimtang sa politika sa nasud paingon sa 2028 presidential elections. Matod pa niya, dili malikayan nga mahimong “hugaw ” ang politika diin adunay mga grupo nga mogamit og pagdaot aron mapalambo ang ilang imahe. Dugang pa niini, nagtuo si Sara Duterte nga misamot ang mga pag-atake batok kaniya human sa iyang pag-anunsyo sa pagdagan sa pagka-Presidente.
Busa, iyang gihangyo ang publiko nga magpabiling maampingon sa mga impormasyon nga makita sa social media, ilabi na sa presensya sa gitawag niyang mga “troll farms”. Sumala pa niya, adunay mga negosyo nga nagtumong sa pagpalapnag og impormasyon—tinuod man o dili—aron maimpluwensyahan ang hunahuna sa katawhan, hinungdan nga gikinahanglan ang mas lawom nga pag-ila sa kamatuoran sa matag balita nga nakaylap sa online.
