Nagpadayon ang evacuation sa mga medic alang sa duha ka pasahero nga nagpakita og sintomas sa hantavirus human sa gidudahang outbreak sa usa ka luxury cruise ship nga karon nagpaabot sa baybayon sa West Africa.
Gibanabanaan nga adunay kapin 150 ka mga tawo nga nagpabilin sa maong mahalon nga cruise human namatay ang tulo ka pasahero nga gilangkuban sa usa ka magtiayon nga Dutch ug usa ka German national, samtang ubang pasahero ang nagkasakit.
Lakip niini ang usa ka Briton nga gidala na sa South Africa alang sa pagpatambal.
Ang hantavirus usa ka talagsaon nga sakit nga mahimong hinungdan sa grabeng respiratory illness ug mapasa pinaagi sa hangin nga adunay kontaminasyon gikan sa ihi o hugaw sa ilaga.
Dili kini sayon mapasa gikan sa usa ka tawo ngadto sa lain.
Sumala sa World Health Organization, ubos ang risgo niini sa mas lapad nga publiko ug dili kinahanglan ang travel restrictions.
Bisan paman niini, isip paglikay, wala tugoti sa Cape Verde nga modunggo ang Dutch-flagged nga MV Hondius.
Samtang, padayon nga gisusi sa operator sa barko nga Oceanwide Expeditions ang posibilidad nga mahikling ang mga pasahero ngadto sa ubang lugar, lakip ang Las Palmas ug Tenerife, samtang giplano usab ang repatriation sa mga apektadong crew.
Sumala sa kompanya, ipatuman na ang hugot nga health protocols sulod sa barko aron malikayan ang pagkaylap sa sakit.
Nahibal-an nga nagsugod ang biyahe sa MV Hondius gikan sa Ushuaia, Argentina niadtong Marso ug miagi sa nagkalain-laing lugar lakip ang Antarctica ug pipila ka isla sa Atlantic sa wala pa miabot sa Cape Verde niadtong Mayo
