Gitakdang mas palig-onon karong Lunes, Mayo 4, sa House Committee on Justice ang taho nga irekomenda na ang Articles of Impeachment sa Senado batok kang Vice President Sara Duterte.
Sumala kay House Justice Committee Chair ug Batangas 2nd District Rep. Gerville Luistro, nahuman na sa komite ang pagsusi kung adunay probable cause ang mga ebidensiya nga gilatag kanila. Migawas sa mga pagdungog ang pipila ka mga bug-at nga alegar batok sa Bise,lakip na niini ang kuno’y mali nga paggamit sa P612.5 milyon nga confidential funds, kung asa P125 milyon ang nagasto sulod lamang sa 24 ka oras.
Gisaway sab sa House Committee on Good Government and Public Accountability ang “envelope system” ug mga kadudahang mga resibo. Sa lahi nga forensic analysis sa National Bureau of Investigation (NBI), migawas kuno ang pagpameke sa mga pirma.
Base sab sa Philippine Statistics Authority (PSA), nahibal-an sab ang peke nga pangalan sa mga recepient, samtang gikumpirma sab sa Commission on Audit (COA) ang disallowance nga muabot sa kapin P73 milyon.
Usa pa sa mga gihisgutan mao ang pagsaka sa kabtangan ni VP Sara. Sumala sa datos sa Ombudsman, mikabat sa P88 milyon ang iyang Net Worth niadtong tuig 2024. Apan, gisulti sab sa Anti-Money Laundering Council (AMLC) nga aduna silay nakita nga kadudahan nga transaksyon nga mikabat sa P6.7 bilyon nga kuno’y may kalabotan si Sara Duterte ug ang iyang asawa nga si Atty. Manases Carpio.
Apil usab ang mga hulga nga “kill threat” batok kang Pangulong Ferdinand Marcos Jr., First Lady Liza Marcos ug kanhi speaker Martin Romualdez.
