Gibutyag sa Philippine Embassy sa France nga dili kini mahimong molihok sa paagi nga makalapas sa soberanya sa usa ka host country.
Kini may kalabotan sa kaso ni kanhi Ako Bicol Party-list Rep. Elizaldy “Zaldy” Co nga gi-report nga anaa sa France ug mihangyo og asylum.
Sumala kang Ambassador Ed De Vega, kinahanglan mosunod ang embahada sa international law ug dili basta-basta makadakop sa bisan kinsang Pilipino sa France.
Matod niya, susama usab kini sa French Embassy sa Manila nga dili usab mahimong magpatuman og police operations o mang-aresto sulod sa Pilipinas.
Dugang pa sa ambassador, nasabtan nila ang kabalaka sa publiko apan kinahanglan nga agian kini sa hustong proseso ug diplomasya ang lihok sa gobyerno.
Samtang, gibutyag usab niya nga ang mosunod nga mga pahayag mahitungod niini manggikan na lamang sa Office of the President.
Una niini, gikumpirma sa mga opisyal sa Pilipinas sa Prague nga wala na sa kustodiya sa Czech authorities si Co, samtang gipaklaro sa Department of Foreign Affairs nga gikansela na ang iyang regular ug diplomatic passports niadtong Disyembre 2025 ug gi-report na kini sa International Criminal Police Organization (Interpol).
